Sén De. Colmán mac hui Chluasaig, fer legind Corcaige, is e dorigne in n‑immun-sa di-a ṡóerad ar in m̅buidechair ro·bóe ir‑remis mac n‑Oeda Sláne. Ar roptar imda doine i nHerinn in tan-sein, ocus rob e a n‑immed con na roichtis acht trí nói immaire do cech ḟir i nHerinn .i. a nói do móin, ocus a nói do min, ocus a nói do chaill ; co ro·throiscset maithe fer n‑Erenn im meic n‑Óida Sláne ocus im Fechine Fabair ocus im (Ailer)án ocus im Manchan Leith acu im sochaide archena, im huatigud na ndoine, ar dodechaid tercca bíd ann ar a n‑immed ; conid aire-sein tuccad in buidechair forru, conid de atbathatar meic Æda Sláne isin bliadain-sin, ocus na sruithe ro·ráidsem, et alii multi. Dicunt alii combad Cholman dogneth uile ; atberat fairen aile na dernai acht da rann de nammá, ocus in scol di‑a dénaim (o‑sin) immach .i. leth-rann /cech ḟir dib. I Corcaig dorigned, i n‑amseir [fol. 5.] da macc Æda Sláne .i. Blaithmac ocus Diarmait. Is e immorro tuccait a dénma : teidm mór do·ratad for firu Herinn .i. in Bude Connaill, co ro·sirestar Herenn hule, ocus co na farcaib acht cech tres dune i nHerinn i mbethaid ; ocus conid di‑a n‑anacul co n‑a scoil doróne ar in teidm-sen Colman in n‑immun-sa. Ocus is ann do·rola do-som a denam, in tan ro·thinscanastar ascnam co araile inse mara Herenn amaig, for teched in tedma-sa, combetis .ix. tonna eturru ocus tír, ar ní tic teidm tarais innunn, ut ferunt periti ; co ro·iarfaig araile don scoil Cholman ‘ cia sen i tarla doib dul for set,’ conid ann-sein atrubairt Colmán, ‘ cia sén on tra,’ ol seissom, ‘ acht sé Dé ? ’ Ar iss-ed ro·thrialsat-som, dul for insib mara immach, for teched res[in] ṅgalur.
